Bojana Jovanovski

La Bojana Jovanovski (Belgrâd, 31 ad Dicémbar dal 1991, ciamàda in Sèrb Бојана Јовановски) l'è na tenìsta sèrba ch'l'è stada la nùmar trénta-quàtar dal mónd in singulàr al 6 ad Śnar dal 2014. L'è élta 175 cm e la péśa 65 chilo. La dróa al bras dèstar e la tira 'l arvèrs a dū maṅ. Al sò atōr preferî 'l è Ashton Kutcher e la scólta al canti dl'Adele, dla Lana Del Rey e ad Robbie Williams. A gh piàś magnàr la pizza.

In dla sò caréra l'à śugâ e vins dū finàli WTA, la prima a Baku al 28 ad Luj dal 2012 (6-3 6-1 a la Julia Cohen) e la secónda a Taškent al 14 ad Setémbar dal 2013 (4-6, 7-5, 7-6 a l'Ol'ga Govorcova). Inóltar al 27 ad Setémbar dal 2013 la s è misa in bisàca anc al tìtul WTA 125 ad Ningbo dand un 6-7 6-4 6-1 a la śugadōra ad cà, la cinéśa Shuai Zhang.

Nada al dè ad San Silvéstar dal 1991 la śóga al sò prim turnèo ITF a quatórd'ś an. In dal Luj dal 2008 la vins al sò prim ITF da déś-mila dòlar in sla tèra rósa e pò subìt àtar dū in Agóst e Setémbar. In Nuvémbar e Dicémbar la in śóga dū in Ìndia da sinquànta-mila dòlar e l'è bòna ad rivàr in semifinàl e in finàl, pardénd da l'Ayumi Morita e da la Sandra Záhlavová. La sèra 'l an a la puśisiòṅ 561. In dal Nuvémbar dal 2009 la śóga atri dū finàli ITF pardénd-li ma la s piàsa listés a 'l 189śum pòst dla clasìfica.

In dal 2010 la fà al sò debùt in dal sircùit WTA a Kuala Lumpur e la riva a 'l secónd tùran pardénd cun l'Elena Dement'eva par 2-6 3-6. In Avrìl la tōś part a dū ITF. In dal prim a Torhout la pèrd in semifinàl da la Mona Barthel par 6-7 6-7, in dal secónd l'asfàlta la Bovina par 6-1 6-1 prima ad cédar a la canadéśa Stephanie Dubois par 6-7 2-6. In Avrìl a taca par lē la stagiòṅ di turnèo WTA in sla tèra batùda. A Fès la bat la Barbora Záhlavová-Strýcová 6-3 6-1 prima ad cédar a l'Angelique Kerber 2-6 2-6. A Róma la pasa 'l qualificasiòṅ ma pò la céd subìt a la Jaroslava Švedova par 2-6 2-6, stés quèl anc a Varsàvia ma chè l'è la Sara Errani a sćiancàrla 6-1 6-0. Eastbourne l'è invéci la prima tapa dal sircùit in sl'èrba e lē la n pasa minga 'l qualificasiòṅ parchè dòp un 6-3 6-4 a la Melanie South la ciàpa un 1-6 6-1 1-6 da cl'atra ingléśa, l'Heather Watson. A Wimbledon la sténd la Casey Dellacqua par 6-1 6-0 ma pò la céd a la Viktoryja Azaranka par 1-6 4-6. In sal dûr ad Pòrtrōś e 'd Ìstanbul la fà sù dū prim tùran pardénd da la Jelena Janković e da l'Elena Vesnina. La fà sù un bèl riśultâ in Utóbar a Pechîn in dua, dòp avér pasâ 'l qualificasiòṅ, la dà la paga a la Kateryna Bondarenko par 5-7 6-4 6-3 e anc a la Jelena Janković par 4-6 6-2 6-2 par pò pèrdar in di utàṿ da la Shahar Peer par 1-6 2-6. La sèra 'l an śugànd dū finàli ITF: in Dubai la pèrd 6-4 3-6 0-6 da la Sania Mirza, a Pune invéci la bat la rusa Nina Bratčikova 6-4 6-4. La sèrba la dvènta acsè la nùmar stant'òṅ dal mónd.

Dòp un secónd tùran a Brisbane (2-6 5-7 da l'Anastasija Pavljučenkova), in dal 2011 la vins siē incónt'r ad fila a Sydney. Baténd 1-6 7-5 6-0 la Lourdes Domínguez Lino, 6-2 5-7 7-5 l'Arantxa Rus e 6-4 6-2 a la Sorana Cîrstea la pasa 'l qualificasiòṅ e pò la cuntìnua cun un 6-4 6-4 a la Kaia Kanepi, un 7-6 7-6 a l'Aravane Rezaï e un 6-4 6-1 a la Flavia Pennetta prima ad cédar a la Na Li in semifinàl par 6-7 3-6. La stmana dòp, da nùmar 58 dal mónd, la và fóra a gl'Australian Open da la Vera Zvonarëva a 'l secónd tùran. A Kuala Lumpur la riva in di quàrt (6-7 2-6 da la Jelena Dokić) ma a Indian Wells e a Miami la s férma subìt. 'L è 'l inìsi 'd un perìud négar in dua la sèrba la và fóra sèmpar a 'l prim o a 'l secónd tùran ch'al finìs sōl in Luj a Washington in dua la riva in di quàrt pardénd in tut al manéri da la Nadia Petrova par 6-7 5-7. A Carlsbad la và a cà subìt par cólpa dla Roberta Vinci mént'r a Turònt la cata la strada saràda a 'l secónd tùran cóntar la Marija Šarapova. A Cincinnati, Dallas, US Open, Taškent, Cantòn, Tokyo e Pechîn la ciàpa sōl dal scòpli in sal cupét, sèt prim tùran cun Yanina Wickmayer, Gisela Dulko, Serena Williams, Sorana Cîrstea, Tetiana Luzhanska, Angelique Kerber e Francesca Schiavone. A Mósca l'è secónd tùran ma la scòpla la riva listés (6-1 6-1 da la Vera Zvonarëva).

In dal 2012 la partìs mâl e par rivàr in di quàrt 'd un WTA la gh'à da spetàr Avrìl e 'l turnèo ad Cupenàghen in dua la và fóra in tri sét cun la Petra Martić. A Wimbledon la và davśèṅ a mandàr a cà la Sabine Lisicki pardénd sèg sōl 6-3 2-6 6-8 a 'l secónd tùran. Al méś dòp però la Bojana la s cava la sudisfasiòṅ ad mét'r-as in bisàca al sò prim tìtul WTA a Baku baténd in semifinàl l'Aleksandra Panova 6-2 6-2 e in finàl la Julia Cohen 6-3 6-1. In Agóst la śóga la semifinàl a Dallas ma la Roberta Vinci la la mét in riga par 6-0 6-0. A gl'US Open la bat la Mona Barthel 4-6 7-5 6-2 ma minga la Dominika Cibulková ch'la gh'à la méj sèg cun dū tie-break. La sèra 'l an cuma 56śma dal mónd.

In dal 2013 la Jovanovski la riva in di quàrt a Shenzhen (3-6 3-6 da la Na Li) e in di utàṿ a Melbourne (1-6 6-3 5-7 a la Sloane Stephens) ma pò la mét in fila soquànt prim tùran a Indian Wells (6-2 5-7 3-6 da la Garbiñe Muguruza Blanco), a Miami (3-6 1-6 da l'Andrea Petković) e a Bruxelles (2-6 7-6 4-6 da la Varvara Lepchenko), sōl a Róma la mét a ségn un cólp baténd la nùmar nóṿ dal mónd, la Caroline Wozniacki, ma pò la pèrd listés a 'l secónd tùran da la Jelena Janković. A 'l Roland Garros la bat la Barbora Záhlavová-Strýcová 6-3 6-2 e incóra la Wozniacki 7-6 6-3 prima 'd andàr a cà a 'l tèrs tùran da la Svetlana Kuznecova par 4-6 6-7. Anc a Birmingham la vins dū partìdi (cun l'Eugenie Bouchard e cun l'Andrea Hlaváčková) prima ad far al valìś cun la Sorana Cîrstea cun al puntéǵ ad 1-6 6-1 1-6. A la fiṅ 'd Agóst la śóga gl'US Open in dua la bat l'Andrea Petković ma la pèrd da la Petra Kvitová. In Setémbar invéci l'è bòna ad far suo dū tìtui a Taškent (pardénd da 'l qualificasiòṅ) e a Ningbo, baténd l'Ol'ga Govorcova e la Shuai Zhang. La finìs 'l an c'n i quàrt in Lussembûrgh, dand 6-4 6-3 a la Francesca Schiavone e 6-1 6-4 a la Su-Wei Hsieh prima ad cédar in tri sét a la Caroline Wozniacki.

• (EN) Al sò sit uficiàl Facebook
• (EN) La sò schéda in sal sit dla WTA